Nú um miðjan desember hefur enn fækkað í stóðinu. Í fyrra komu 6 hross í árs fóður og eru þau nú farin. Svo er annað verra að Salvör er horfin og finnst hvergi enda hvít eins og snjórinn og færið til leitar hefur verið afleitt. En folaldið er komið til eiganda síns. Salvöru áttu Ingvar og Malin nágrannakona okkar saman og folaldið í ár á Malin. Myndin er frá því 2009.

Auður er líka farin úr stóðinu en hún seldist til Þýskalands og flaug út 18.des. Myndin er af Auði og Fanneyju tamningakonu. Aðeins 3 hross eru komin á hús en Ingvar er að vinna að breytingum í hesthúsinu sem vonandi klárast fljótlega. Inni eru Spurning, Álfrún og Kardináli sem einnig seldist á dögunum. Kardináli verður hjá okkur eitthvað áfram en framtíðarheimili hans verður í Sviss.

Assa og Pía flugu út til nýrra heimkynna 26.okt. Þær eiga vonandi eftir að standa sig vel og höfum við fengið skilaboð um að fyrstu kynni lofi góðu. Fluga flutti hins vegar til himna en grunur um að hún væri blind reyndist réttur. Eftirsjá eftir þessari fallegu Grettisdóttur en svona getur þetta verið stundum. Þessi tvö í vinstra horninu eru óskyld þó þau séu svona skemmtilega "eins " á litin.

Í byrjun nóv. verður stóðið rekið heim til að sortera fyrir veturinn og einhver folöld fara í hvíta húsið. Undanfarið hefur fækkað í stóðinu og til að sporna við of mikilli fækkun þá keyptum við þessar vindóttu hryssur. Það hefur lengi verið draumur að eignast vindótt og loks var það látið eftir sér. Báðar eru þær af skagfirsku kyni og fæddar 2010.