Við höfum ákveðið að á nýju ári munum við hætta að skrifa hér inn á fréttasíðuna. Áfram verður uppfært á hryssusíðuna og sölusíðuna. Við ætlum hins vegar að vísa þeim sem hafa áhuga á að fylgjast með okkur á að "læka" síðuna okkar á facebook : Víðidalstunga II. Takk fyrir að fylgjast með okkur.

Um miðjan desember fengu folöldin fyrstu heyrúlluna ásamt mæðrum sínum. Gaman að fylgjast með þeim þegar þau voru að skoða og smakka úr rúllunni. Veturgömlu trippin fóru með í heyið en þau sem eftir voru urðu frekar ósátt en röltu að lokum aftur á beit. Nóg beit er enn og því óþarfi að setja allt á gjöf strax.

Í byrjun desember tókum við Dís og Myrkva inn ásamt Úða sem var að koma heim úr tamningu. Þau eru öll til sölu. Dís er þæg og traust undan Plötu og Kardinála en um Myrkva og Úða má lesa á sölusíðunni. Myndin sýnir stóðið koma röltandi á móti okkur eins og þau eru vön að gera þegar við kíkjum til þeirra.

Birna er seld og farin til nýrra eigenda í Þýskalandi. Vonandi á þessi flotta fótaburðarhryssa eftir að
standa sig vel. Eitt folald er til sölu og er mynd af því á sölusíðunni. Myndin er af Dimmu dóttur Náttdrafnar og Smára frá Skagaströnd.Náttdröfn hefur gefið nokkur fín reiðhross og er Dimma virkilega spennandi.