Nóvember og orðið vetrarlegt.Hrossin eru í góðum haga og enn er ekkert á húsi hjá okkur. Vel hefur gengið með geldingana sem fóru að heiman í tamningu og styttist í að þeir komi í frí. Fljótlega eftir að Askur og Konsert fóru í tamningu þá sendum við Úða að heiman líka en hann er árinu eldri. Myndin er af þeim Væng, Álfhildi og Kaðli.

Það var ekki lengi sem öll hrossin okkar voru heima en stuttu eftir stóðréttir eru bæði Askur og Konsert farnir í tamningu. Myndin er af Konsert. Hann er fæddur 2010 og er sonur Kórónu og Tenórs frá Túnsbergi. Askur er líka fæddur 2010 og er sonur Plötu og Arðs frá Brautarholti. Eldri hrossin eru nú farin í haustfrí enda stærri smalanir haustins að baki.

Myndin er tekin þegar stóðið af Víðidalstunguheiði kom til byggða 4. október s.l. Réttin var svo daginn eftir eins og venja er. Við fengum öll trippin okkar heim og við fengum líka fullt af skemmtilegum gestum. Bestu þakkir fyrir komuna og hjálpina og velkomin aftur ! Fleiri myndir af þessum viðburði á facebooksíðunni okkar, Víðidalstunga II.

Kardináli okkar er farinn til nýrra eiganda og hefur kynnt sig vel. Alltaf gaman þegar það kemur póstur frá glöðum eigendum hrossa frá okkur. Rysja og Bragi eru flutt að heiman og vonandi eiga þau líka eftir að gleðja eigendur sína í Þýskalandi. Rysju var haldið á Íslandi í sumar undir Dagfara frá Sauðárkróki og mun því kasta í Þýskalandi næsta sumar.