Stóðréttir 5. október eða eftir aðeins 1 viku og maður er enn að bíða eftir sumrinu! En það verður gaman að sjá trippin aftur og alla gestina sem taka þátt í réttarstemmingunni með okkur. Plata og Sök sónuðust með fyli og eru komnar í heimahaga. Allar hryssur sem voru hjá Sjóði frá Kirkjubæ eru löngu farnar heim og haustverkin langt komin.

Birna er búin að vera í tamningu og kemur heim fljótlega í svolitla hvíld. Myndin er af henni og tamningakonunni hennar. Eftir stóðréttinar verða þá öll hrossin okkar heima um tíma og minna um að vera í hestamennskunni þó líklega verði smalahrossin á járnum fram í miðjan Október.

Kominn ágúst og ungu hrossin eru farin að týnast heim í haustfrí. Á myndinni er Erna sem er 5 vetra og hefur verið í tamningu í sumar. Hún fær nú frí í nokkra mánuði og vonandi notar tímann til að hugsa jákvætt um allt sem hún hefur verið að læra.

Myrkvi 6 vetra er búinn að læra mikið í sumar. Hann er stór og þarf sinn tíma til að ná styrk. Spennandi hestur sem við höfum trú á að eigi eftir að verða mjög góður. Við erum mjög ánægð með þjálfunina á hrossunum sem eru að koma heim eftir sumarið en öll voru þau hjá tamningafólki sem eru menntaðir reiðkennarar frá Hólum.