Ágúst er skemmtilegur tími í hestamennskunni. Þá er búið að heyja á engjunum meðfram Víðidalsá svo fullt af reiðleiðum verða færar til útreiða. Smalahrossin eru komin á járn og nágrannar ríða milli bæja til að undirbúa þau fyrir haustverkin.Þessir gestir komu í kaffisopa meðan hrossin slökuðu aðeins á í gerðinu. Greinilega allir í Hestamannafélaginu Þyt !

Djásnið okkar hún Aþena er komin heim.
Ísólfur Líndal sýndi hana í kynbótadómi 15. júlí.
Fékk hún 7,82 í aðaleinkunn sem er fínn dómur hjá klárhryssu en vægið mætti vera hliðhollara klárhrossunum.
Eigandinn og ræktandinn mátti til með
að prófa hana og var alsæll eftir reiðtúrinn.
Fleiri myndir af Aþenu koma síðar.

27.júní voru trippin rekin á Víðidalstunguheiði.Hefð
hefur ríkt með upprekstur og smalanir,við tilheyrum vestrinu.Bændur austan megin hafa verið stoltir af því að tilheyra því svæði frekar en nú eru fleiri farnir að reka hrossin upp að vestan svo líklega styttist í að stóðsmölun þyki tilkomumeiri þar.200 trippi fögnuðu frelsinu á heiðinni þennan dag.
Hluti hópsins að leggja af stað.

Þetta er Kapall frá Kommu undan Kjarnorku og Álfi frá Selfossi. Hann er ásamt hryssunum sínum í hólfi hjá okkur . Það er ekki hægt að segja annað en Kjarnorka komi við sögu í ræktuninni hjá okkur um þessar mundir. Sonur Hrundar er undan Kafteini frá Kommu. Plata er hjá Kapli og Aþena var sædd við Kappa frá Kommu um daginn.