JÁ SÆLL var það sem kom upp í huga manns þegar þessi efnilegi skeiðgammur geystist hjá. Þetta er sonur Salvarar og Kardinála, aðeins sólarhringsgamall. Salvör kastaði loks 24. júní.
Það kemur ekki á óvart að folaldið hafi fimmta gírinn í lagi. Móðirin gat heldur betur skeiðað á árum áður.

Þessi spræki strákur er undan Stelpu og Kardínála. Myndarlegur og mjög framfallegur. Kardínáli kemur heim í vikunni til að sinna hryssunum á bænum og fær frí frá frekara námi í reiðmennsku til haustsins .

Þann 15. júní kastaði Hrund og afkvæmið var "bara" brúnn hestur en ræktandinn er sáttur. Enginn reiðhestur er til undan Hrund sem er orðin 16v. Þessi fer ekki á söluskrá og er tilhlökkunarefni að eignast reiðhest ef hann verður jafn frábær og móðirin. Faðirinn ætti varla að spilla fyrir en hann er Kafteinn frá Kommu, stórættaður og hálfbróðir Kappa frá Kommu.

Í dag, 14. júní, er enn beðið eftir að Hrund og Salvör kasti. Hrund hlýtur kasta í dag eða á morgun. Aðrar eru kastaðar og eru þessi 3 folöld þau elstu í hópnum. Þau eru mjög lík svo manni gæti dottið í hug þríburar en svo er auðvitað ekki.